سليمان راشد حسن
غريب القلب وعمايله
ملوش كتالوج ولا سيستم
يحب بجد و بيكره
وبرضو بسرعه بيسلم
فيه ناس جواه بتبنى قصور وتسكنها
وناس تانيه بنظرة عين بيكره شكلها ولونها
وناس موجوده جوه القلب برغم إللى بيعملوه فينا
وناس من كتر قساوتهم قلوبنا استنجدت بينا
مفيش سلطان عليه من حد
مفيش غير ربنا المعبود
ولو أمرُه بمَحَبِةْ حد
لا يُمكن عن أوامرُه يِحيد
ولو قَدر لُه رَبُه الكُرهْ
هَيكره حتى لو عاشق
ومهما حاولوا يتصالحوا
خلاص سهم الفراق راشق
حِكايته بتبتدى بنظرة بدون تَمهيد
بيتحمل أذى الأحباب ويبقى سعيد
ولو قرر ينهى أى كلام
لو إتحدت ملوك الأرض مش هيعود
يلف الكون بسَرَحانُه مع المحبوب
يبات فرحان كفرحتنا برجوع غايب
ولو باع حد مفيش قوة معاه هتفيد
أكيد مش فارقه ميت رقعه فى توب دايب.
سليمان راشد حسن
ليست هناك تعليقات:
إرسال تعليق